साउदी अरेबिया । नेपालमा आएको प्राकृतिक विपत्तिबाट ठूलो जनधनको क्षति भएपछि साउदी अरेबियामा रहेका नेपालीहरूले राहत तथा उद्धारका लागि सहयोग अभियान अघि बढाएका छन्।
यसैक्रममा अन्तर संस्था समन्वय समिति रियादका अध्यक्ष अमृत पौडेलले नेपालमा भएको दुःखद् घटनाप्रति गहिरो दुःख व्यक्त गर्दै विपत्तिमा ज्यान गुमाउने सम्पूर्णप्रति हार्दिक श्रद्धाञ्जली अर्पण गरेका छन्।
अध्यक्ष पौडेलले घाइते तथा बेपत्ता नागरिकहरूको शीघ्र उद्धारका लागि सक्दो प्रयासमा जुट्ने प्रतिबद्धता व्यक्त गर्दै विपद्को समयमा आर्थिक सहयोग महत्वपूर्ण रहेको बताएका छन्।
उनका अनुसार अन्तर संस्था समन्वय समिति रियादको पहलमा प्रधानमन्त्री राहत कोषमार्फत ५ लाख रुपैयाँ सहयोग गर्ने योजनासहित आर्थिक सहयोग अभियान सुरु गरिएको छ।
अध्यक्ष पौडेलले साउदी अरेबियामा रहेका सम्पूर्ण नेपाली संघ–संस्था तथा सदस्यहरूलाई यस अभियानमा सहकार्य गर्न हार्दिक अनुरोध गरेका छन्।
विपत्तिको यस कठिन घडीमा सबै नेपाली एकजुट भई पीडितको उद्धार, राहत तथा पुनर्स्थापनाका लागि सहयोग गर्नुपर्नेमा उनले जोड दिएका छन्।
Discussion about this post