साउदी अरब । चीनको सिजाङ (तिब्बत) क्षेत्रबाट आएको भीषण बाढीका कारण रसुवा, नुवाकोट, धादिङलगायत जिल्लाका विभिन्न क्षेत्रमा भएको जनधनको क्षतिप्रति प्रवासी नेपाली मञ्च, साउदी अरेबियाले दुःख व्यक्त गर्दै राहत रकम प्रदान गरेको छ।
प्रवासी नेपाली मञ्च, साउदी अरेबियाले बाढी तथा पहिरोबाट प्रभावित नागरिकको उद्धार, राहत तथा पुनर्स्थापनामा सहयोग पुर्याउने उद्देश्यले रु. ४ लाख १५ हजार ३ सय ५९ प्रधानमन्त्री दैवी प्रकोप उद्धार कोषमा जम्मा गरेको जनाएको छ।
मञ्चका अनुसार उक्त रकम ग्लोबल आइएमई बैंकमा रहेको ‘Prime Minister Disaster Relief Fund’ को खाता नम्बर 00401010000057 मा जम्मा गरिएको हो।
भीषण बाढीका कारण रसुवागढी, टिमुरे, स्याफ्रुबेंसी, मैलुङ, बेत्रावती, त्रिशूलीलगायतका विभिन्न बस्तीमा अकल्पनीय मानवीय तथा भौतिक क्षति भएको भन्दै मञ्चले दुःख व्यक्त गरेको छ।
मञ्चले विपत्तिमा ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गरेको छ। साथै, प्रभावित नागरिकहरूको शीघ्र उद्धार, राहत तथा पुनर्स्थापनाका लागि नेपाल सरकार, स्थानीय तह, सम्बन्धित निकाय तथा सम्पूर्ण नेपाली समुदायलाई प्रभावकारी रूपमा जुट्न आह्वान गरेको छ।
यसैक्रममा पहिलो चरणमा जनसम्पर्क समिति, साउदी अरबको रु. ५ लाख ५५ हजार ५ सय ५५, प्रवासी नेपाली सम्पर्क विभाग, साउदी अरबले रु. १० लाख २५ हजार तथा प्रवासी नेपाली मञ्च, साउदी अरबले रु. ४ लाख १५ हजार ३ सय ५९ राहत रकम सहयोग गरेको जनाएको छ।
तीनवटै सहयोग जोड्दा साउदी अरबबाट हालसम्म रु. १९ लाख ९५ हजार ९४ रुपैयाँ आर्थिक सहयोग जुटेको छ।
Discussion about this post