दमाम, साउदी अरब ।
साउदी अरबमा कृयाशिल सामाजिक संस्था ‘हेल्प मधेशी साउदी अरब’ ले आफ्नो स्थापनाको एक दशक पूरा गरेको अवसरमा भव्य कार्यक्रम आयोजना गर्ने भएको छ। आगामी २७ फेब्रुअरी २०२६, शुक्रबारका दिन दमाम–जुबेल हाइवेस्थित सफा (Safwa) मा संस्थाको दशौँ वार्षिकोत्सव, छैटौँ राष्ट्रिय महाधिवेशन तथा होली विशेष सांस्कृतिक कार्यक्रम एकैसाथ सम्पन्न हुन लागेको हो।
संस्थाले प्रवासमा रहेका नेपालीहरूबीच आपसी एकता, सामाजिक सद्भाव र आफ्नो विशिष्ट सांस्कृतिक पहिचानलाई जोगाइराख्ने उद्देश्यले यो त्रिवेणी कार्यक्रमको तर्जुमा गरेको जनाएको छ। कार्यक्रममा सांगठनिक प्रतिवेदन र नयाँ नेतृत्व चयनका प्रक्रियाका साथै रङहरूको पर्व होलीलाई उत्सवका रूपमा मनाउन विभिन्न सांस्कृतिक प्रस्तुतिहरू समेत समावेश गरिनेछ।
“एकता, संस्कृतिको सौन्दर्य र होलीको रङसँगै समुदायको उत्सवलाई अझ अर्थपूर्ण बनाऔँ” भन्ने मूल नाराका साथ आयोजना हुन लागेको यस कार्यक्रममा सहभागी हुन आयोजकले साउदी अरबमा कार्यरत सम्पूर्ण नेपाली दाजुभाइ तथा दिदीबहिनीहरूलाई आग्रह गरेको छ। विशेष गरी बुद्धिजीवी, समाजसेवी, सञ्चारकर्मी र विभिन्न संघ–संस्थाका प्रतिनिधिहरूको गरिमामय उपस्थितिले प्रवासमा नेपाली पहिचान थप प्रगाढ हुने विश्वास व्यक्त गरिएको छ।
यस कार्यक्रमले एकातिर संस्थाको १० वर्षको उपलब्धि र आगामी कार्यदिशा तय गर्नेछ भने अर्कोतिर कामको सिलसिलामा परदेशमा रहेका नेपालीहरूलाई चाडपर्वको रौनकमार्फत घरदेशको न्यास्रो मेटाउने अवसर प्रदान गर्ने आयोजकको दाबी छ।
Discussion about this post