जानकी, १६ मङ््िसर ः–बाँकेको जानकी गाउँपालिकाले गुणस्तरीय पूर्वाधार निर्माणको लागि उपभोक्ता समितिलाई अभिमुखीकरण तालिम प्रदान गरेको छ ।
गाउँपालिकाले आर्थिक वर्ष २०७६÷०७७ मा सम्पन्न गर्न लागेको पूर्वाधार विकासका योजना कार्यान्वयनको लागि वडास्तरमा गठन भएका उपभोक्ता समितिका पदाधिकारीलाई योजना कार्यान्वयनमा अपनाउनु पर्ने आवश्यक ज्ञान सीपवारे जानकारी दिन तालिमको आयोजना गरिएको गाउँपालिकाका अध्यक्ष रामनिवास यादवले जानकारी दिनुभयो ।
विगतमा कतिपय उपभोक्ता समितिका पदाधिकारीले अञ्जानवश विकास निर्माणका कार्यमा गुणस्तरीयता कायम गर्न नसकेको पाईएकोले यो वर्ष सजकता अपनाईएको उहाँको भनाई छ ।
गाउँपालिकाका छ वटै वडामा गठन भएका उपभोक्ता समितिका अध्यक्ष , सचिव र कोषाध्यक्षलाई उपभोक्ता समितिको काम, कत्र्तव्य र उत्तरदायित्व सँग–सँगै योजनाको काम शुरुवातदेखि फछ््र्यौटसम्मको प्रक्रियाका वारेमा समेत जानकारी गराईएको गाउँपालिकाका प्रमुख प्रशासकीय अधिकृत हरिबहादुर खत्रीले जानकारी दिनुभयो ।
आज गाउँपालिकाको वडा नं. १ साईगाउँ र वडा नं. २ बेलभारमा गठित उपभोक्ता समितिका पदाधिकारीहरुको लागि आयोजित अभिमुखिकरण तालिमको उद््घाटन समारोहमा बोल्दै गाउँपालिका अध्यक्ष यादवले विकास निर्माणका काम गर्दा विनियोजित बजेट र कार्यक्रम अनुसार कुनैपनि भेदभाव र अनियमितता नगर्न अनुरोध गर्नु भयो । विकासका काम कहिकतै अनियमितता भएको थाहा पाउन साथ तत्काल कार्वाही गर्न आफू बाध्यहुने उहाँको भनाई थियो ।
गाउँपालिकाका प्रमुख प्रशासकीय अधिकृत खत्रीले योजना कार्यान्वयनको जिम्मा र लाभ लिने पनि स्थानीय बासिन्दा भएकोले निर्माणमा स्थानीयले जिम्मेवारीका साथ काम गर्नु पर्ने बताउनु भयो ।
सो अवसरमा वडा नं. १ का अध्यक्ष मोहमद रजा राई, वडा नं. २ का अध्यक्ष चन्द्रिकाप्रसाद गुप्ता, कार्यपालिका सदस्य एवम्् पूर्वाधार विकास संयोजक राजकुमार धोवी लगायतले उपभोक्ता समितिको जिम्मेवारी र भूमिका ठूलो हुने भएकोले इमान्दारिताका साथ गुणस्तरीयता कायम गरी योजना सम्पन्न गर्नुपर्नेमा जोड दिनुभयो ।
जानकी गाउँपालिकाले अन्य वडाका उपभोक्ता समितिलाई यसअघिनै अभिमुखीकरण तालिम दिईसकेको छ । तालिममा प्रमुख प्रशासकीय अधिकृत खत्री, योजना शाखा प्रमुख ईन्जिनियर निसार अहमद दर्जी, योजना शाखाका राजेन्द्र बाजपेयी लगायतले सहजिकरण गर्नु भएको छ ।
Discussion about this post