रियाद, साउदी अरब। साउदी अरबमा रहेका प्रवासी नेपाली समुदायबीच खेलकुदमार्फत एकता, सद्भाव र भाइचाराको सन्देश प्रवाह गर्दै आयोजित पाँचौँ रियाद कप–२०२६ को उपाधि आयोजक रियाद फुटबल क्लब (रेड टिम) ले जितेको छ। फाइनल खेलमा युनाइटेड फुटबल क्लब लाई ३–० गोल अन्तरले पराजित गर्दै रियाद एफसी च्याम्पियन बनेको हो।
रियाद फुटबल क्लबद्वारा आयोजित प्रतियोगितामा साउदी अरबका विभिन्न क्षेत्रबाट आएका १५ टोलीको सहभागिता रहेको थियो। प्रतियोगिताभर उत्कृष्ट प्रदर्शन गरेको रियाद एफसीले फाइनलमा पनि प्रभावशाली खेल प्रस्तुत गर्दै उपाधिमाथि कब्जा जमाएको हो। युनाइटेड एफसी भने उपविजेतामा सीमित रह्यो।
उपाधिसँगै विजेता रियाद एफसीले ७ हजार साउदी रियाल नगद, ट्रफी, मेडल तथा प्रमाणपत्र प्राप्त गरेको छ। त्यसैगरी उपविजेता युनाइटेड एफसीले ३ हजार ५ सय साउदी रियाल, ट्रफी, मेडल तथा प्रमाणपत्र प्राप्त गरेको आयोजकले जनाएको छ।
https://www.facebook.com/share/v/1EYMJ43rpw/https://www.facebook.com/share/v/1EYMJ43rpw/
प्रतिस्पर्धात्मक र रोमाञ्चक खेलहरूबीच सम्पन्न प्रतियोगिताले साउदी अरबस्थित नेपाली समुदायमा फुटबलप्रतिको आकर्षण र उत्साहलाई थप बढाएको आयोजकको भनाइ छ। खेल अवधिभर दर्शकहरूको उल्लेख्य उपस्थितिले प्रतियोगितालाई थप भव्य र उत्साहपूर्ण बनाएको थियो।
रियाद एफसी परिवारले प्रतियोगिता सफल बनाउन प्रत्यक्ष तथा अप्रत्यक्ष रूपमा सहयोग, समन्वय तथा योगदान पुर्याउने प्रायोजक, सहयोगीदाता, खेलाडी, स्वयंसेवक, व्यवस्थापन टोली, निर्णायक मण्डल तथा खेलप्रेमी दर्शकहरूप्रति हार्दिक आभार व्यक्त गरेको छ।
आयोजकका अनुसार सहभागी टोलीहरूबीचको स्वस्थ प्रतिस्पर्धा, दर्शकहरूको उत्साहजनक साथ र सम्पूर्ण पक्षको सहकार्यका कारण प्रतियोगिता व्यवस्थित, सभ्य र स्मरणीय रूपमा सम्पन्न भएको हो। रियाद एफसीले आगामी दिनमा पनि नेपाली समुदायबीच खेलकुदको विकास, आपसी सद्भाव र एकतालाई प्रवर्द्धन गर्ने उद्देश्यका साथ यस्ता प्रतियोगिताहरूलाई निरन्तरता दिने प्रतिबद्धता व्यक्त गरेको छ।
साउदी अरबको राजधानी रियादमा सम्पन्न पाँचौँ रियाद कप–२०२६ ले प्रवासी नेपालीहरूबीच खेलकुदमार्फत सम्बन्ध सुदृढ बनाउने, प्रतिभा उजागर गर्ने तथा सामुदायिक एकतालाई थप मजबुत बनाउने महत्वपूर्ण भूमिका खेलेको सहभागीहरूले बताएका छन्।
Discussion about this post