दलितले उत्पादन गरेको तरकारी खान नमिल्ने भन्दै वडा अध्यक्षको विभेदपूर्ण निर्णय!

खोटाङ, असार १५ – खोटाङ जिल्लाको ऐसेलुखर्क गाउँपालिका–२ मा सामाजिक विभेदको गम्भीर घटना सार्वजनिक भएको छ। सो वडाका अध्यक्ष नन्दकुमार तामाङले दलित समुदायकी एक महिलाले सञ्चालन गर्दै आएको कृषि फर्मलाई सिफारिस नदिने निर्णय गरेका छन्।

स्थानीय रिता दमाईले आफ्नै परिश्रममा तरकारी खेती गर्दै कृषि व्यवसाय अगाडि बढाउँदै आएकी थिइन्। तर वडा अध्यक्ष तामाङले “दमाईले छोएको तरकारी कसैले खाँदैन” भन्ने विवादास्पद अभिव्यक्तिसहित उनकी कृषि फर्मको सिफारिसमा रोक लगाएको खुलेको छ।

घटना सार्वजनिक भएपछि स्थानीयस्तरमा विरोध र सामाजिक संजालमा आलोचना बढेको छ। धेरैले यसलाई जातीय विभेदको स्पष्ट उदाहरण भन्दै सम्बन्धित निकायसँग अनुसन्धान र कारबाहीको माग गरेका छन्।

मानव अधिकारकर्मीहरूको प्रतिक्रिया

मानव अधिकारकर्मीहरू भन्छन् – “दलित समुदायमाथिको यस्तो व्यवहार संविधान र मानव अधिकारको उल्लङ्घन हो। यसमा तत्काल छानबिन गरी आवश्यक कारबाही हुनु पर्छ।”

स्थानिय बासिन्दाको भनाइ

एक स्थानीय बासिन्दाले बताए – “रिता दमाई मेहनती किसान हुन्। उनको उत्पादन गुणस्तरीय छ। यस्तो सोचले समाजलाई अझै पछाडि धकेल्छ।”