नेपाली जनसम्पर्क समिति साउदी अरबको तेस्रो राष्ट्रिय अधिवेशन निर्विरोध नेतृत्व चयनसहित सम्पन्न

रियाद, पौष ११ – नेपाली काँग्रेसको विदेशस्थित आधिकारिक भ्रातृ संगठन नेपाली जनसम्पर्क समिति साउदी अरबको तेस्रो राष्ट्रिय अधिवेशन २०२५ शुक्रबार साउदी अरबको राजधानी रियादमा ऐतिहासिक, सौहार्दपूर्ण र निर्विरोध नेतृत्व चयनसहित सम्पन्न भएको छ।

अधिवेशनमा नेपाली काँग्रेसका केन्द्रीय सदस्य एवं नेपाली जनसम्पर्क समिति समन्वय विभाग प्रमुख किरणराज शर्मा पौडेल प्रमुख अतिथिका रूपमा सहभागी हुनुहुन्थ्यो भने नेपाली राजदूतावास रियादका श्रम काउन्सेलर कबिराज उप्रेती विशिष्ट अतिथिका रूपमा उपस्थित रहनुभएको थियो।

कार्यक्रममा गैरआवासीय नेपाली संघ (एनआरएनए), विभिन्न राजनीतिक दलका विदेशस्थित भ्रातृ संगठन, जातीय तथा जिल्लागत संघसंस्था, साउदी अरबमा क्रियाशील नेपाली बैंक तथा रेमिट्यान्स कम्पनीका प्रतिनिधि, पत्रकार, समाजसेवी तथा बुद्धिजीवीहरूको उल्लेखनीय सहभागिता रहेको थियो। साथै साउदी अरबमा रहेका नेपाली काँग्रेसप्रति आस्थावान अग्रज, सहकर्मी र कार्यकर्ताको सक्रिय उपस्थितिले अधिवेशनलाई भव्य र स्मरणीय बनाएको आयोजकले जनाएको छ।

अधिवेशनबाट २०२५–२०२८ कार्यकालका लागि २९ सदस्यीय नयाँ कार्यसमिति निर्विरोध चयन भएको छ। नवनिर्वाचित कार्यसमितिले प्रवासमा रहेका नेपाली श्रमिकको हक–हित संरक्षण, संगठन सुदृढीकरण, लोकतान्त्रिक मूल्यको रक्षा तथा मातृभूमिप्रतिको उत्तरदायित्व वहन गर्दै नेपाली दूतावास र सम्बन्धित निकायसँग सहकार्य गरेर जिम्मेवार र परिणाममुखी भूमिका निर्वाह गर्ने प्रतिबद्धता जनाएको छ।

नेपाली जनसम्पर्क समिति साउदी अरबले प्रवासमा रहेका नेपाली श्रमिकको समस्या, अन्याय र शोषणका विरुद्ध आवाज उठाउँदै उद्धार, कानुनी सहजीकरण, घरफिर्ती तथा मानवीय सहयोगका कार्यमा निरन्तर अग्रपंक्तिमा काम गर्दै आएको छ। साथै महाभूकम्प, कोरोना महामारी, बाढीपहिरो, आगलागी जस्ता दैवी प्रकोपका बेला राहत तथा सहयोग अभियानमा सक्रिय भूमिका निर्वाह गर्दै आएको तथ्य पनि अधिवेशनमा स्मरण गरिएको थियो।

यस अवसरमा साउदी अरबमा रहनु भएका नेपाली काँग्रेसप्रति आस्था राख्ने तर हालसम्म नेपाली जनसम्पर्क समिति साउदी अरबमा औपचारिक रूपमा आबद्ध नभएका सबैलाई पार्टीको आधिकारिक प्रवासी संगठनमार्फत एकताबद्ध भई लोकतान्त्रिक मूल्य र श्रमिकको हक–हितका लागि हातेमालो गर्न आह्वान गरिएको छ।

अधिवेशनको सफलताका लागि प्रत्यक्ष तथा अप्रत्यक्ष रूपमा सहयोग पुर्‍याउने सम्पूर्ण सदस्य, शुभेच्छुक, संघसंस्था, मिडिया तथा पत्रकारप्रति नेपाली जनसम्पर्क समिति साउदी अरबले हार्दिक धन्यवाद तथा कृतज्ञता व्यक्त गरेको छ।