नेपाल–साउदीबीच साधारण श्रमिक भर्तीसम्बन्धी ऐतिहासिक श्रम सम्झौतामा हस्ताक्षर

नेपाल सरकार र साउदी अरब सरकारबीच साधारण श्रमिक (General Workers) को सुरक्षित, व्यवस्थित तथा मर्यादित वैदेशिक रोजगारी प्रवर्द्धन गर्ने उद्देश्यले मिति २०८२ माघ ११ गते आइतबार साउदी अरबको रियादमा श्रमिक भर्ना सम्बन्धी द्विपक्षीय श्रम सम्झौता (Agreement on Workers Recruitment Between the Government of Nepal and the Government of the Kingdom of Saudi Arabia) मा हस्ताक्षर सम्पन्न भएको छ ।

सम्झौतामा नेपाल सरकारका तर्फबाट श्रम, रोजगार तथा सामाजिक सुरक्षा मन्त्री, माननीय राजेन्द्र सिंह भण्डारी र साउदी अरब सरकारका तर्फबाट मानव संशाधन तथा सामाजिक विकास मन्त्री, माननीय अहमद बिन सुलेमान अलराजीले हस्ताक्षर गर्नुभएको छ ।

द्धिपक्षीय श्रम सम्झौतामा हस्ताक्षर गर्नु पूर्व दुबै देशका माननीय श्रम मन्त्रीज्युबीच द्धिपक्षीय बैठक भएको थियो । सो क्रममा मन्त्री भण्डारीले यो सम्झौताले नेपाल–साउदी अरबबीच श्रम सहकार्यलाई थप संस्थागत र मजबुत बनाउने विश्वास व्यक्त गर्नुभयो । साथै सम्झौता नेपाली साधारण श्रमिकहरूको भर्ती प्रक्रिया पारदर्शी, न्यायोचित र लागत–प्रभावकारी बनाउन एक महत्वपूर्ण दस्तावेज हुनेमा आफू विश्वस्त रहेको धारणा व्यक्त गर्नुभयो । यसबाट साउदी अरबमा कार्यरत नेपाली श्रमिकहरुको हकहीतको रक्षा र रोजगारको सुरक्षा हुने अपेक्षा रहेको बताउनु भयो ।

सम्झौतामा श्रमिकहरूको सेवा सुविधा, कामको अवस्था, सामाजिक सुरक्षा, स्वास्थ्य सेवा, श्रम सम्झौता कार्यान्वयन, गुनासो व्यवस्थापन तथा श्रमिक अधिकार संरक्षणका विषयहरूलाई प्राथमिकताका साथ समेटिएको छ । सम्झौताले दुवै देशका कानुन, अन्तर्राष्ट्रिय श्रम मापदण्ड र आपसी समझदारीको आधारमा श्रमिकको हित सुनिश्चित गर्ने अपेक्षा गरिएको छ । यसबाट साउदी अरबमा कार्यरत तथा भविष्यमा यहाँ आउने नेपाली श्रमिकहरूको सेवा सुविधामा सुरक्षा र स्थायित्व आउने विश्वास लिइएको छ ।

नेपाली राजदूतावास, रियाद

२५ जनवरी २०२६

साभार :- Embassy of Nepal, Riyadh नेपाली राजदूतावास, रियाद बाट