साउदीको पूर्वी क्षेत्र तमिमी अबकैक्याम्पमा खुला पुरुष भलिबल प्रतियोगिता हुने

दम्माम, साउदी अरब । -अन्जान गुभाजु
मुस्लिम धर्मावलम्बीहरूको दोस्रो महान पर्व बकर ईदको अवसर पारेर साउदी अरेबियाको पूर्वी क्षेत्र दम्मामस्थित दोस्रो औद्योगिक क्षेत्रमा नेपाली खेलाडीहरूबीच खुला पुरुष भलिबल प्रतियोगिता आयोजना हुने भएको छ ।

तमिमी ग्लोवल स्पोर्ट्स क्लबको आयोजनामा आगामी २०८२ जेठ १२ गते (२६ मे २०२६) मंगलबार प्रतियोगिता सञ्चालन गरिने आयोजकले जनाएको छ । प्रतियोगिता दम्मामको तमिमीको नयाँ शिविर क्षेत्रअन्तर्गत रहेको औद्योगिक क्षेत्रमा आयोजना गरिनेछ ।

आयोजकका अनुसार प्रतियोगितामा सहभागी हुन इच्छुक टोलीहरूलाई समयमै टिम दर्ता गराउन आग्रह गरिएको छ । खेल बेलुकी ८ बजे देखी सञ्चालन हुने जनाइएको छ ।

प्रतियोगितामा प्रथम हुने टोलीलाई दुई हजार साउदी रियालसहित ट्रफी र मेडल प्रदान गरिनेछ । यस्तै दोस्रो हुने टोलीले एक हजार साउदी रियालसहित ट्रफी र मेडल प्राप्त गर्नेछ भने तेस्रो स्थान हासिल गर्ने टोलीलाई पाँच सय साउदी रियालसहित ट्रफी र मेडल प्रदान गरिने आयोजकले जनाएको छ ।

प्रतियोगिताको टिम दर्ता शुल्क तीन सय साउदी रियाल निर्धारण गरिएको छ । खेललाई व्यवस्थित, मर्यादित र अनुशासित बनाउन विभिन्न नियमहरू लागू गरिएको आयोजकको भनाइ छ । दर्ता भएका खेलाडी मात्र प्रतियोगितामा सहभागी हुन पाउने, खेल अवधिभर अनिवार्य रूपमा टोलीको पोशाक लगाउनुपर्ने तथा मदिरा सेवन पूर्ण रूपमा निषेध गरिएको जनाइएको छ ।

प्रतियोगितालाई सफल बनाउन टोली व्यवस्थापक दीपक कुमार बस्नेत, प्रशिक्षक इन्द्र थापा, टोली कप्तान विकास तामाङ तथा संयोजक सुमन राई सक्रिय रूपमा जुटिरहेका छन् ।

साउदी अरबमा रहेका नेपाली युवाहरूबीच खेलकुदमार्फत आपसी सम्बन्ध सुदृढ बनाउने, एकता अभिवृद्धि गर्ने तथा स्वस्थ मनोरञ्जन प्रदान गर्ने उद्देश्यले प्रतियोगिता आयोजना गरिएको आयोजकले जनाएको छ ।

बकर ईदको सार्वजनिक बिदाको अवसरमा साउदी अरेबियाका विभिन्न शहरहरूमा रहेका नेपाली समुदायले खेलकुद तथा सांस्कृतिक कार्यक्रमहरू आयोजना गर्ने क्रमसमेत बढ्दै गएको छ ।