रियाद, साउदी अरब — गत १५ मे २०२६ मा राष्ट्रिय स्वतन्त्र पार्टी (RSP) प्रवास नेपाली सम्पर्क समिति, रियाद, साउदी अरबद्वारा आयोजित दोस्रो ऐतिहासिक क्षेत्रीय अधिवेशन भव्य, सभ्य तथा उत्साहजनक वातावरणमा सफलतापूर्वक सम्पन्न भएको छ। प्रवास भूमिमा रहेर पनि मातृभूमिप्रतिको दायित्व, लोकतान्त्रिक मूल्य–मान्यता तथा सुशासनप्रतिको प्रतिबद्धतालाई आत्मसात गर्दै सम्पन्न उक्त अधिवेशनले प्रवासी नेपाली समुदायमा नयाँ ऊर्जा, उत्साह र आशा सञ्चार गरेको सहभागीहरूले बताएका छन्।
रियादमा सम्पन्न अधिवेशनमा विभिन्न जिल्लाबाट प्रतिनिधित्व गर्ने प्रवासी नेपालीहरूको उल्लेखनीय उपस्थिति रहेको थियो। कार्यक्रममा राष्ट्रिय स्वतन्त्र पार्टीप्रति आस्था राख्ने शुभेच्छुक, समाजसेवी, बुद्धिजीवी, पत्रकार, युवा तथा विभिन्न पेशा–व्यवसायमा आबद्ध नेपालीहरूको सक्रिय सहभागिताले कार्यक्रमलाई अझ भव्य र प्रभावकारी बनाएको थियो।
अधिवेशनले संगठन विस्तार, प्रवासी नेपालीहरूको हक–हित, श्रमिकका समस्या, सामाजिक एकता तथा राष्ट्रिय राजनीतिमा प्रवासको भूमिकाका विषयमा गम्भीर छलफल गरेको थियो। वक्ताहरूले नेपालबाट हजारौं किलोमिटर टाढा रहेर पनि देश, समाज र लोकतान्त्रिक मूल्यमान्यताप्रति निरन्तर समर्पित रहनुपर्ने आवश्यकता औंल्याएका थिए।
कार्यक्रमको विशेष आकर्षणका रूपमा विभिन्न व्यक्तित्वहरूको योगदानको उच्च कदर गर्दै सम्मान–पत्र हस्तान्तरण गरिएको थियो। संगठन निर्माण, प्रवासी नेपालीहरूबीच एकता कायम गर्न, अधिवेशन सफल बनाउन तथा पार्टीलाई प्रवासमा सुदृढ बनाउन महत्त्वपूर्ण भूमिका निर्वाह गर्ने व्यक्तित्वहरूलाई सम्मान गरिएको थियो।
कार्यक्रमलाई सम्बोधन गर्दै प्रवास नेपाली सम्पर्क विभागका केन्द्रीय सभापति भुपाल भण्डारीले प्रवासमा रहेका नेपालीहरूको भूमिका राष्ट्र निर्माणमा अत्यन्त महत्त्वपूर्ण रहेको बताउनुभयो। उहाँले विदेशमा पसिना बगाइरहेका नेपालीहरू केवल रेमिट्यान्स पठाउने माध्यम मात्र नभई परिवर्तनका संवाहक भएको उल्लेख गर्दै प्रवासी नेपालीहरूको आवाजलाई अझ सशक्त बनाउनुपर्नेमा जोड दिनुभयो।
त्यसैगरी, निवर्तमान रियाद शाखा सभापति मनीस लामाले आफ्नो कार्यकालको अनुभव साझा गर्दै संगठनलाई प्रवासमा स्थापित गर्न सबै साथीहरूको साथ, सहयोग र एकता निर्णायक रहेको बताउनुभयो। निवर्तमान सचिव उमेश भट्टले आफ्नो दुई वर्षे कार्यकालको संक्षिप्त प्रतिवेदन प्रस्तुत गर्दै संगठनात्मक गतिविधि, सामाजिक अभियान तथा सदस्य विस्तारका विषयमा जानकारी गराउनुभयो।
कार्यक्रममा प्रमुख सल्लाहकार राजेन्द्र थापा, मोरङ–सुनसरी सेवा समाजका अध्यक्ष नागेश तामाङ, समाजसेवी यम तमु तथा प्रवास नेपाली सम्पर्क विभागका केन्द्रीय सचिव पदमराज पन्थीले भर्चुअल माध्यममार्फत शुभकामना मन्तव्य व्यक्त गर्नुभएको थियो। वक्ताहरूले प्रवासी नेपालीहरूबीच सहकार्य, एकता र आपसी विश्वासलाई अझ बलियो बनाउनुपर्ने आवश्यकता औंल्याएका थिए।
यस अधिवेशनमार्फत रियाद शाखाको नयाँ कार्यसमिति चयन गरिएको छ। नव–निर्वाचित कार्यसमितिको नेतृत्वमा खगेन्द्र बराल सभापतिमा चयन हुनुभएको छ।
त्यसैगरी सुवाश पनेरु उपसभापति, दिपक बहादुर विष्ट सचिव, निरोज भण्डारी सह–सचिव र ईश्वर प्रसाद अधिकारी कोषाध्यक्षमा चयन हुनुभएको छ। सदस्यहरूमा अनिता तामाङ, सजिनता राई, दिल बहादुर कटुवाल, गणेश अधिकारी, प्रकाश साउद तथा फुल सिंह कुमाल चयन हुनुभएको छ।
अधिवेशन सफल बनाउन विभिन्न तहबाट सहयोग पुर्याउने स्वयंसेवक, आयोजक टोली, पत्रकार, सामाजिक अभियन्ता तथा सम्पूर्ण सहभागीहरूप्रति आयोजकले आभार व्यक्त गरेको छ। कार्यक्रमको समापन गर्दै आयोजकले आगामी दिनमा संगठन विस्तार, सामाजिक एकता, श्रमिकका हक–हित तथा राष्ट्रहितका अभियानलाई अझ प्रभावकारी रूपमा अगाडि बढाइने प्रतिबद्धता व्यक्त गरेको छ।
Discussion about this post