साउदीमा कार्यरत तेज सिलवालको ‘तीजको व्रत’ टिकटक र रिल्समा भाइरल

काठमाडौं । साउदी अरेबियामा कार्यरत नेपाली स्रष्टा तथा नेपाली साझा मञ्च, साउदी अरेबियाका महासचिव तेज सिलवालको संगीतमा रहेको नयाँ तीज गीत ‘तीजको व्रत’ सार्वजनिक भएको केही समयमै टिकटक र फेसबुक रिल्समा भाइरल बनेको छ। मौलिक तीज संस्कृति, नेपाली महिलाको भावना र समसामयिक यथार्थलाई समेटिएको गीतले स्वदेश तथा विदेशमा रहेका नेपाली श्रोतामाझ राम्रो प्रतिक्रिया बटुलिरहेको छ।

गीतमा चर्चित गायिका मिना बेलबासे र टीका सानुको सुमधुर स्वर रहेको छ भने शब्द नवीन घिमिरेले सिर्जना गरेका हुन्। “तीजको व्रत बसेकी छु शिवजी, यसपालि त लगन जुराइदेऊ” बोलले विशेषगरी माइतीघरमा रहेर पनि एक्लै जीवन सङ्घर्ष गरिरहेका तथा एकल महिलाहरूको मनोभावलाई मार्मिक ढंगले प्रस्तुत गरेको छ। जीवनका सुख–दुःख सँगै बाँड्ने असल जीवनसाथीको चाहनालाई गीतले भावुक शैलीमा अभिव्यक्त गरेको छ।

गीतको भिडियोमा कृस्टिना साह ठकुरी र सोमिता खनालको अभिनय रहेको छ भने निर्देशन शिवजी क्षत्रीले गरेका छन्। कलरिङ तथा सम्पादन नवीन घर्ती मगर, एरेन्ज भुमिराज थापा मगर, रेकर्डिङ तथा मिक्सिङ सुरज भुसाल र कृष्ण बाजुरालीले गरेका हुन्। ‘द म्युजिक ईरा’ स्टुडियोमा तयार गरिएको यस गीतले सार्वजनिक भएलगत्तै सामाजिक सञ्जालमा उल्लेखनीय लोकप्रियता हासिल गर्दै यस वर्षको चर्चित तीज गीतमध्ये एक बन्न सफल भएको छ।