काठमाडौं — दशैंको फूलपातीको अवसर पारेर सार्वजनिक हुन लागेको बहुप्रतिक्षित नेपाली चलचित्र ‘बलिदान’ को टिजर अगाडि, निर्माण पक्षले फिल्मका विशेष पात्रहरूको झलक सार्वजनिक गरेको छ।

फिल्मले समाजका कुना–काप्चामा लुकेका ती पीडाहरू, विद्रोहहरू र असल आवाजलाई पर्दामा उतार्ने दाबी गर्दै कलाकारहरूको पहिलो लुक्स सार्वजनिक गरिएको हो।

चलचित्रमा सयौं फिल्ममा खलनायकको भूमिकामा दर्शकको मन जितिसकेका हेमन्त बुढाथोकी एकदमै प्रभावशाली भूमिकामा देखिने भएका छन्। उनका दृश्यहरूले कथाको मेरुदण्ड नै हल्लिने निर्माण टिमको दाबी छ।

यस्तै, गम्भीर अभिनय शैली र गहिरा भूमिकाका लागि चिनिने अर्पण थापा को उपस्थितिले फिल्मलाई गहिराइ दिनेछ। उनका हरेक हेराइ र अभिव्यक्तिमा चरित्रको पीडा, विद्रोह र मौन सत्य झल्किने निर्माण पक्षको विश्वास छ।

फिल्ममा फरक सोच र दृष्टिकोणका साथ समाजलाई पर्दामा उतार्ने अभिनेत्री रिचा शर्मा पनि मुख्य भूमिकामा रहेकी छन्। संवादमा जीवनका असल मर्म झल्काउने रिचाको भूमिका दर्शकलाई गहिरो सन्देश दिने अपेक्षा गरिएको छ।

यिनै पात्रहरूसँगै फिल्मका निर्देशक तथा लेखक आफैँले पनि एउटा सामाजिक रूपले परिभाषित पात्रमार्फत आफ्नो उपस्थिति दर्शक सामु प्रस्तुत गरेका छन्।

पोस्टर मात्र नभई समाजका दबिएका आवाजहरूको प्रतिनिधित्व गर्ने अनुहारहरू प्रस्तुत गरिएको भन्दै निर्माण टिमले फिल्मप्रति उत्साह बढाउने उद्देश्यसहित यी झलकहरू सार्वजनिक गरेको जनाएको छ।

दशैफूलपातीमाबलिदान #जय_काली