प्रधानमन्त्री ओली दुबई हुँदै तुर्कमेनिस्तान प्रस्थान

काठमाडौँ, साउन १९ । प्रधानमन्त्री केपी शर्मा ओली दुबई हुँदै तुर्कमेनिस्तान प्रस्थान गरेका छन् । भूपरिवेष्टित विकासशील राष्ट्रहरू (एलएलडिसी)को तेस्रो संयुक्त राष्ट्रसंघ सम्मेलनमा सहभागी हुन उनी तुर्कमेनिस्तान जाँदैछन् ।

प्रधानमन्त्री ओली नेतृत्वको प्रतिनिधिमण्डल गएराति ११:५५ बजे दुबईका लागि उडान भरेको थियो । टोली दुबईको स्थानीय समय अनुसार बिहान ३ बजे दुबई अन्तर्राष्ट्रिय विमानस्थलमा अवतरण गरेको प्रधानमन्त्री सचिवालयले जनाएको छ ।

दुबई विमानस्थलमा प्रधानमन्त्री ओलीलाई युएईका लागि नेपाली राजदूत तेजबहादुर क्षेत्री लगायतका अधिकारीहरूले स्वागत गरेका थिए ।

प्रधानमन्त्री ओली यही साउन २० देखि २३ गतेसम्म (अगस्ट ५ देखि ८) तुर्कमेनिस्तानको अवाजा सहरमा हुने सम्मेलनमा सहभागी हुँदैछन् । सम्मेलन तुर्कमेनिस्तानका राष्ट्रपति सेरदार बेरदिमुहामेदोभ र संयुक्त राष्ट्रसंघका महासचिव एन्टोनियो गुटेरेसको औपचारिक निमन्त्रणामा आयोजना गरिएको हो ।