उमेस भट्ट
रियाद, साउदी अरब — अलरबिया हस्पिटलमा लामो समय रोकिएको नेपाली नागरिक ॐ नाथ योगीको शव अन्ततः आवश्यक सबै प्रक्रिया पुरा गर्दै नेपाल पठाइएकाे छ। कागजात, बीमा तथा क्लीयरन्स प्रक्रियामा भएको दीर्घ ढिलाइ हटेपछि दूतावास, प्रवासी नेपाली सम्पर्क विभाग र समुदायको संयुक्त पहलले अन्ततः परिणाम देखाएको हो।
कम्पनीको ढिलाइपछि परिवारको पीडा
मिर्गौला फेल (Kidney Failure) भई निधन भएका योगीको शव आवश्यक कागजात अभावमा दिनौँसम्म अस्पतालमै रोकिँदा परिवार गम्भीर तनावमा थियो।
योगीका साला बब्लु गीरीले कंपनीले बीमा तथा कागजी प्रक्रिया अघि बढाउन समयमै जिम्मेवारी नलिँदा समस्या झनै पेचिलो बनेको बताएका थिए।
दूतावास र प्रवासी नेपाली सम्पर्क विभागको प्रभावकारी पहल
समुदायमा घटना सार्वजनिक भएपछि प्रवासी नेपाली सम्पर्क विभाग, रियाद शाखाका सभापति मनीस लामा नेतृत्वको टोलीले विषयलाई दूतावासमा औपचारिकरूपमा पेस गरेको थियो।
दूतावासले पनि साउदी पक्षसँग समन्वय गर्दै रोकिएको क्लीयरन्स प्रक्रिया तीव्रताका साथ अघि बढाएको र अन्ततः सबै कागजात प्राप्त भएपछि शव नेपाल पठाउने प्रक्रिया सफलतापूर्वक सम्पन्न गरिएको दूतावास स्रोतले जनाएको छ।
समाजसेवी र संघ–संस्थाको सक्रियता
समाजसेवी यम तामु, प्रवासी नेपाली सम्पर्क विभाग र रास्वपा रियाद शाखाका प्रतिनिधिहरूले निरन्तर दबाब र समन्वय गर्दै परिवारको पीडा सम्बोधनमा महत्वपूर्ण भूमिका खेलेका छन्।
शव नेपाल पठाइयो
सबै प्रशासनिक प्रक्रिया टुंगिएपछि अलरबिया हस्पिटलमा रोकिएको शवलाई अन्ततः आवश्यक कागज पूरा गरी नेपाल पठाइएको परिवारले पुष्टि गरेको छ।
परिवारले सहायता, दबाब र समन्वयमा सहभागी सबैलाई धन्यवाद व्यक्त गर्दै दिवंगतको अन्तिम संस्कार नेपालमै गर्ने तयारी थालेका छन्।
Discussion about this post