साउदी अरबमा १६ वर्षदेखि बन्धकझैँ बाँचिरहेकी नेपाली चेलीको सकुशल उद्धार

रियाद, साउदी अरब — भारतमार्फत नक्कली पासपोर्ट बनाएर दलालहरूले बेचिदिएपछि साउदी अरबमा १६ वर्षदेखि बन्धकझैँ जीवन बिताउँदै आएकी एक नेपाली चेलीलाई सकुशल उद्धार गरिएको छ। उनका अनुसार ती वर्षहरू शोषण, पीडा र असह्य यातनाले भरिएका थिए।

समाजसेवी यम तामुको सक्रिय पहल र साउदीस्थित नेपाली दूतावासको समन्वयमा सम्पन्न उद्धारपछि अहिले ती चेली सुरक्षित रूपमा दूतावासको संरक्षणमा राखिएका छन्।

उद्धारको क्रममा भेट्दा चेलीको अवर्णनीय अवस्था, आँसु र दुःखद कथा देखेर समाजसेवी यम तामु स्वयं भावुक बनेका थिए। साउदीमा लालीगुराँस रेस्टुरेन्ट सञ्चालन गर्दै आएका तामुले “१६ वर्षको पीडा सुन्दै पनि हृदय टुट्छ,” भन्दै भावुक प्रतिक्रिया दिएका थिए।

यस घटनाले खाडी मुलुकमा रोजगारीका नाममा बेचिन बाध्य महिला कामदारहरूको वास्तविकता फेरि उजागर भएको छ। बिचौलियाको लोभ, कमजोर नियमन र भारतमार्फत हुने अवैध पासपोर्ट प्रक्रियाले धेरै नेपाली चेलीहरू आज पनि बन्दीजस्तै जीवन बिताइरहेका छन्। विशेषज्ञहरूका अनुसार यस्ता घटनाहरू रोक्न कडाइ, निगरानी र सजगता अत्यन्त आवश्यक छ।