बाढीपहिरोमा ज्यान गुमाएकाप्रति साउदीका विभिन्न शहर बाट श्रद्धाञ्जली, विपत्तिमा प्रवासी नेपाली एकजुट

रियाद । नेपालमा हालै आएको विनाशकारी बाढीपहिरोमा परी ज्यान गुमाएका नागरिकप्रति श्रद्धाञ्जली तथा शोकसन्तप्त परिवारप्रति समवेदना व्यक्त गर्दै साउदी अरबका विभिन्न शहरमा श्रद्धाञ्जली सभा सम्पन्न भएका छन्।

प्रवास नेपाली सम्पर्क बिभागको आयोजनामा शुक्रबार जुबेल, रियाद र अल कासिममा आयोजित कार्यक्रममा नेपाली समुदायका विभिन्न संघ–संस्था, सामाजिक अभियन्ता तथा प्रवासी नेपालीहरूको सहभागिता रहेको थियो। सहभागीहरूले विपद्मा ज्यान गुमाउनेहरूप्रति भावपूर्ण श्रद्धाञ्जली अर्पण गर्दै प्रभावित परिवारप्रति ऐक्यबद्धता जनाएका थिए।

प्रवास सम्पर्क विभाग, साउदी अरबका अध्यक्ष भूपाल भण्डारीले प्राकृतिक विपद्को पीडामा प्रवासी नेपाली समुदायले दुःखमा साथ दिने र राहत, उद्धार तथा मानवीय सहयोगका कार्यमा एकताबद्ध भएर अघि बढ्नुपर्नेमा जोड दिएका छन्।

उनले विपद्को समयमा देश तथा समुदायप्रतिको जिम्मेवारी अझ महत्वपूर्ण हुने धारणा व्यक्त गरे।जुबेलमा साँझ ६ बजे, रियादस्थित डिमोरा होटलमा बिहान १० बजे तथा अल कासिममा साँझ ७ बजे श्रद्धाञ्जली सभा आयोजना गरिएको थियो।यसैबीच, हेल्प मधेसी साउदी अरबले शुक्रबार दम्मामको सेकेन्ड सनैयामा श्रद्धाञ्जली सभा आयोजना गरेको छ। कार्यक्रममा नेपाली समुदायका प्रतिनिधि, सामाजिक अभियन्ता तथा प्रवासी नेपालीहरूको सहभागिता रहेको थियो।

सहभागीहरूले बाढीपहिरोमा ज्यान गुमाउनेहरूप्रति श्रद्धाञ्जली अर्पण गर्दै पीडित परिवारप्रति समवेदना व्यक्त गरेका थिए।हेल्प मधेसी साउदी अरबका अध्यक्ष श्यामकुमार महतोले विपद्को यस कठिन समयमा पीडित परिवारको दुःखमा प्रवासी नेपाली समुदाय साथमा रहेको बताउँदै राहत तथा मानवीय सहयोगका लागि सबैलाई एकजुट हुन आग्रह गरेका छन्।

साउदीमा सम्पन्न यी श्रद्धाञ्जली सभाले हजारौँ किलोमिटर टाढा रहे पनि मातृभूमिमा परेको विपद्को पीडामा प्रवासी नेपाली समुदाय भावनात्मक रूपमा जोडिएको सन्देश दिएको छ। सहभागीहरूले विपद् प्रभावितको उद्धार, राहत तथा पुनःस्थापनामा निरन्तर सहयोग आवश्यक रहेकोमा जोड दिएका छन्।