स्व. सुनिल थापाप्रति समर्पित ‘राम नाम सत्य’ को टिजर सार्वजनिक, विराज भट्टको आक्रामक एक्सन अवतार

नेपाली चलचित्र जगतका प्रभावशाली अभिनेता सुनिल थापाको संझनामा चलचित्र ‘राम नाम सत्य’ को आधिकारिक टिजर सार्वजनिक गरिएको छ। यो चलचित्र थापाको अन्तिम चलचित्रसमेत हो, जसको क्लाइमेक्स छायांकनका क्रममै उनको हालै हृदयघातका कारण निधन भएको थियो। युट्युबमा सार्वजनिक गरिएको टिजरमा अभिनेता विराज भट्टलाई निकै शक्तिशाली र आक्रामक ‘एक्सन’ भूमिकामा प्रस्तुत गरिएको छ। भट्टको यो नयाँ लुक्सले दर्शकमा फिल्मप्रति थप कौतुहलता पैदा गरेको छ। फिल्ममा एक्सनका साथै सस्पेन्स, थ्रीलर र प्रेमका पक्षहरूलाई निकै सन्तुलित ढंगले समेटिएको दाबी निर्माण पक्षको छ।

माइकल चन्दको कथा, पटकथा र निर्देशनमा तयार भएको यस फिल्ममा सुनिल थापा र विराज भट्टका साथै सुशील श्रेष्ठ, दिव्या रायमाझी, सुपुष्पा भट्ट, आयुषसिंह ठकुरी र प्रशान्त ताम्राकार लगायतका कलाकारहरूको मुख्य अभिनय रहेको छ। ‘राम नाम सत्य’ मा कार्यकारी निर्माता: किशोर भट्ट, राजेन्द्र भट्ट र अर्जुन सुनार ,संगीत: बाबुल गिरी, अर्जुन पोखरेल, एसडी योगी र नवाज अन्सारी,छायांकन: मानकृष्ण महर्जन,द्वन्द्व निर्देशन: श्री श्रेष्ठ,सम्पादन: बन्दे प्रसाद रहेको छ ।

चलचित्रमा समावेश ‘धागोले बाटेको’ बोलको गीत सार्वजनिक भए लगत्तै सुपरहिट भइसकेको छ। विराज भट्ट र सुपुष्पा भट्ट फिचर्ड यो रोमान्टिक गीतले फिल्मको प्रचारमा ठूलो सहयोग पुर्‍याएको छ।अभिमन्यु निरवी र समय थपलियाले स्क्रिप्ट सल्लाहकारको भूमिका निभाएको यो चलचित्र आगामी २७ चैत (नयाँ वर्ष २०८३ को पूर्वसन्ध्या) देखि नेपालभरका सिनेमा हलहरूमा प्रदर्शन हुने तयारीमा छ।