पर्वत समाज साउदी अरबको तदर्थ समिति गठन ,संयोजकमा सापकोटा

रियाद, साउदी अरब । साउदी अरबमा रहेका पर्वतवासी नेपालीहरूलाई एकताबद्ध गर्दै आपसी सहयोग, सद्भाव, सामाजिक सहकार्य तथा कल्याणकारी गतिविधिलाई संस्थागत रूपमा अघि बढाउने उद्देश्यले पर्वत समाज साउदी अरबको तदर्थ समिति गठन गरिएको छ।

२५ सेप्टेम्बर २०२६ मा जुममार्फत सम्पन्न प्रारम्भिक भर्चुअल बैठकले बासुदेव सापकोटाको संयोजकत्वमा तदर्थ समिति गठन गरेको हो। दीपक शर्माको अध्यक्षतामा तथा बासुदेव सापकोटाको सञ्चालनमा सम्पन्न बैठकमा ग्लोबल पर्वत समाजका अध्यक्ष दधि आचार्य प्रमुख अतिथि, महासचिव कमल लामिछाने विशिष्ट अतिथि तथा मध्यपूर्व संयोजक रघुनाथ शर्मा विशेष अतिथिका रूपमा सहभागी हुनुभएको थियो।

बैठकले साउदी अरबका विभिन्न शहर तथा क्षेत्रमा रहेका पर्वतवासीबीच परिचय, सम्पर्क, सहयोग र एकतालाई थप सुदृढ गर्दै सबैलाई एउटै सामाजिक चौतारीमा जोड्ने निर्णय गरेको छ। समाजलाई समावेशी, पारदर्शी, अनुशासित, गैरराजनीतिक तथा सामाजिक सेवामुखी संस्थाका रूपमा अघि बढाउने प्रतिबद्धता पनि व्यक्त गरिएको छ।

नवगठित तदर्थ समितिको महासचिवमा ओम प्रकाश काफ्ले, सचिवमा बसन्त रिजाल, कोषाध्यक्षमा नारायण प्रसाद भुसाल, सह–कोषाध्यक्षमा विष्णु प्रसाद श्रेष्ठ तथा सदस्यहरूमा प्रेम खनाल, टंक प्रसाद काफ्ले, सुरज तिवारी, अमृत सेवा, गोकुल जीसी, शिव भुसाल, धनन्जय, विश्व बेग र विवेक कार्की चयन हुनुभएको छ। समितिलाई थप समावेशी बनाउन आवश्यकताअनुसार एक जना सह–संयोजक र पाँच जना सदस्य मनोनयन गर्न सकिने व्यवस्था गरिएको जनाइएको छ।

समाजले साउदी अरबका विभिन्न शहर, क्षेत्र तथा कार्यस्थलमा रहेका पर्वतवासीको खोजी तथा सम्पर्क विस्तार गरी व्यापक सदस्यता अभियान सञ्चालन गर्ने निर्णय गरेको छ। प्रारम्भिक अभियानदेखि नै जोडिएका पर्वतवासीलाई संस्थापक सदस्यका रूपमा सम्मान गर्ने निर्णयसमेत गरिएको छ।

त्यस्तै, समाजको संस्थागत संरचनालाई व्यवस्थित र दीर्घकालीन बनाउन आगामी महाधिवेशनको तयारीलाई प्राथमिकताका साथ अघि बढाउने निर्णय बैठकले गरेको छ। आगामी दिनमा सामाजिक, मानवीय तथा कल्याणकारी गतिविधिका साथै पर्वतको कला, संस्कृति, पहिचान र पर्यटन प्रवर्द्धनमा योगदान पुर्‍याउने उद्देश्य समाजले लिएको छ।

बैठकमा प्रमुख अतिथि दधि आचार्य, विशिष्ट अतिथि कमल लामिछाने र विशेष अतिथि रघुनाथ शर्माले नवगठित समितिलाई शुभकामना दिँदै पर्वतवासीबीचको एकता, सद्भाव र सहकार्यलाई थप मजबुत बनाउन सुझाव दिनुभएको थियो। नवगठित तदर्थ समितिले साउदी अरबमा रहेका सम्पूर्ण पर्वतवासीलाई समाजको अभियानमा सहभागी हुन आह्वान गरेको छ।