</>
रियाध, साउदी अरेबिया । नेपाली जनसम्पर्क समिति साउदी अरेबियाबाट नेपाली कांग्रेसको १५औँ महाधिवेशनका लागि भिम विश्वकर्मा केन्द्रीय महाधिवेशन प्रतिनिधिमा निर्वाचित हुनुभएको छ।
बाँकेको बैजनाथ गाउँपालिका–५ घर भएका ३२ वर्षीय विश्वकर्मा विगत ११ वर्षदेखि वैदेशिक रोजगारीका क्रममा साउदी अरेबियामा रहँदै आउनुभएको छ। वैदेशिक रोजगारीसँगै उहाँ सामाजिक गतिविधि, पत्रकारिता तथा राजनीतिक क्षेत्रमा समेत सक्रिय रहँदै आउनुभएको छ |
साउदी अरेबियामा रहेका नेपाली श्रमिकका समस्या, उद्धार तथा राहतका विषयमा विभिन्न सामाजिक गतिविधिमा संलग्न हुँदै आउनुभएका विश्वकर्माले पत्रकारितामार्फत प्रवासमा रहेका नेपालीका समस्या र समुदायका विषयहरू सार्वजनिक गर्दै आउनुभएको छ। उहाँले विभिन्न सामाजिक तथा संघसंस्थामा समेत जिम्मेवारी सम्हालिसक्नुभएको जनाइएको छ।
केन्द्रीय महाधिवेशन प्रतिनिधिमा निर्वाचित भएपछि प्रतिक्रिया दिँदै विश्वकर्माले प्रवासमा रहेका नेपालीका हकहित र समस्यालाई पार्टीको नीति निर्माण तहसम्म पुर्याउन आफूले पहल गर्ने बताउनुभयो। उहाँले प्रवासमा रहेका नेपालीको अधिकार, सामाजिक सुरक्षा तथा आपतकालीन अवस्थामा आवश्यक सहयोगका विषयलाई प्राथमिकताका साथ उठाउने प्रतिबद्धता जनाउनुभएको छ।
३२ वर्षको उमेरमा केन्द्रीय महाधिवेशन प्रतिनिधिमा निर्वाचित हुनुभएका विश्वकर्माको चयनलाई साउदी अरेबियामा रहेका नेपाली समुदायका युवामाझ चासोका रूपमा हेरिएको छ।
Discussion about this post