शुक्रबार प्रदेश १ मा थपिए ८३९ कोरोना संक्रमित

१ साउन, इटहरी । कोरोना भाइरस संक्रमण भए नभएको पत्ता लगाउने पीसीआर परीक्षणको दायरा बढाइएसँगै प्रदेश १ मा संक्रमणदर बढेको छ । प्रदेश १ मा शुक्रबार थप ८३९ जनामा संक्रमण पुष्टि भएको छ । ३ हजार ५०९ जनाको पीसीआर परीक्षण गर्दा ३८४ जना महिला र ४५५ जना पुरुषमा संक्रमण देखिएको सामाजिक विकास मन्त्रालयले जनाएको छ । 

मन्त्रालयका अनुसार संक्रमित हुनेमा मोरङका ३३०, सुनसरीका ३०६, झापाका ११७, उदयपुरका २३, धनकुटाका १५, इलाम र भोजपुरका ६–६, संखुवासभा र तेह्रथुमका ४–४, पाँचथरका ३, ताप्लेजुङ, ओखलढुंगा र खोटाङका १–१ र प्रदेश १ बाहिरका २२ जना छन् । 

संक्रमितमध्ये सुनसरीको इटहरीका १७७, धरानका ७२, बराहक्षेत्रका १४, इनरुवाका ७, रामधुनीका ८, बर्जुका ५, दुहबी र भोक्राहा नरसिंहका ४–४, गढीका २, देवानगञ्ज र हरिनगरका १–१ र स्थानीय तह नखुलेका ११ जना रहेको मन्त्रालयको तथ्यांकमा उल्लेख छ । 

शुक्रबार थपिएकासहित प्रदेश १ मा कोरोना संक्रमितको कुल संख्या ७७ हजार ७७६ पुगेको छ । संक्रमितमध्ये ७० हजार ४३० संक्रमणमुक्त भएका छन् । शुक्रबार थप ३६८ जना संक्रमणमुक्त भएका छन् ।

सक्रिय संक्रमितको संख्या ५ हजार ९११ जना रहेको मन्त्रालयले जनाएको छ ।