३१ बैशाख २०७७, बुधबार, साउदी – देवेन्द्र विश्वकर्मा:-
नेपाली जनसम्पर्क समिती साउदिले नेपाली भुमिमा भारतले गरेको सीमा अतिक्रमणको विरुद्ध भत्सर्ना गर्दै विरोध जनाएको छ । नेपालका लिपुलेक,लिम्पियाधुरा र कालापानी लगायतका भु-भागहरुमा गरेको अतिक्रमणका विरुद्धमा आज एक प्रेस विज्ञप्ति निकाल्दै समितिले उक्त विरोध जनाएको हो ।
नेपाली जनसम्पर्क समिती साउदिका सभापति दिपक रेग्मी र महामन्त्री सुरेशराज त्रीपाठीद्वारा हस्ताक्षरित सो विज्ञप्तिमा पुर्खाहरुको त्याग र लडाइँले आर्जित गरेका नेपाली भु- भागहरु ( लिपुलेक,लिम्पियाधुरा,कालापानी ) मा लामो समय देखि भारतले अतिक्रमण गरिरहेको र यसबारे आफ्नो पार्टी नेपाली कांग्रेसको बि पि कोइराला देखि हालसम्मको नेतृत्वले स्पष्ट धारणा राख्दै आएको उल्लेख गरिएको छ ।
भारतले गरेको हेपाहा प्रवृति ज्यादती बढ्दै गइरहेको र स्थिति झन डर लाग्दो भैरहेको अवस्थामा वर्तमान सरकार गैरजिम्मेवार बनेको समेत विज्ञप्तिमा भनिएको छ।
सरकारले राष्ट्र र राष्ट्रियताप्रती गैरजिम्मेवारि अभिव्यक्ति दिनु,सीमा अतिक्रमण र नक्सा सार्वजनिक बारे जानकारी नै छैन भन्नू,साथै चौतर्फी विरोध पछि विज्ञप्ति निकाली जनताको आँखामा छारो हाल्ने काम मात्र हुनु,र सीमा विवाद र अतिक्रमण भएका र हुन लागेका नेपाली भु- भाग फिर्ता ल्याउन कुनै कुटनैतिक पहल नहुनु भन्दै सरकारको निन्दा गर्दै यस्ता गम्भीर विषयमा सरकार गम्भीर नहुनुमा शंका गर्ने ठाउँ प्रशस्त रहेको भन्दै नेपाली जनसम्पर्क समिती साउदिले चिन्ता समेत व्यक्त गरेको छ।
विज्ञप्तिमा भुमी अतिक्रमण र सीमा विवाद कुनै पार्टीको मात्रै नभई सिङ्गो देश र राष्ट्रियता प्रतिको प्रहार र चिन्ताको विषय भएकोले यथाशीघ्र सम्पुर्ण राजनीतिक दलहरु संग छलफल, समन्वय गरि एक राष्ट्रिय धारणा बनाएर उच्चस्तरीय कुटनैतिक पहल गर्न र यसरी पनि समाधान नभए अन्तर्राष्ट्रिय अदालतमा गएर भएपनी नेपालका अतिक्रमित र भु-भागहरु फिर्ता ल्याउन पहल गर्न सरकारलाई आग्रह गरिएको छ।
नेपाली काङ्ग्रेसको अतिक्रमण गरिएको भु-भाग र सीमा विवाद सङ्गै राष्ट्र र राष्ट्रियताको हितमा सरकारको कदम प्रती साथ र सहयोग रहने प्रतिबद्ध रहेको जनाउदै नेपाली जनसम्पर्क समिती साउदिले पार्टिको धारणा प्रती ऐक्यबद्धता जनाउँदै सरकारले ढिलासुस्ती नगरी अतिक्रमण भएका भु-भाग यथाशीघ्र फिर्ता ल्याउन सो विज्ञप्ति मार्फत सरकारलाई अपिल गरेको छ।
Discussion about this post