बाढीपीडित उप्रेतीलाई प्रवास नेपाली सम्पर्क विभागद्वारा हवाई टिकट सहयोग

रियाद । भदौ १० गते त्रिशूली नदीमा आएको विनाशकारी बाढीबाट घर, पसल गुमाएका नुवाकोट, विदुर नगरपालिका–१ का राजकुमार उप्रेतीलाई प्रवास नेपाली सम्पर्क विभाग, साउदी अरबले नेपाल फर्किन हवाई टिकट सहयोग गरेको छ।

साउदी अरबको ताबुकमा रोजगारीरत उप्रेतीलाई कम्पनीले सेप्टेम्बर २ मा नेपाल जान छुट्टी स्वीकृत गरेको भए पनि बाढीबाट ठूलो आर्थिक क्षति व्यहोरेका कारण उहाँसँग हवाई टिकट खरिद गर्न आवश्यक रकम थिएन। बाढीले घर तथा पसलसमेत बगाएपछि आर्थिक संकटमा रहेका उप्रेतीलाई स्वदेश फर्किनसमेत कठिनाइ भएको थियो।

उप्रेतीको अवस्थाबारे सामाजिक व्यक्तित्व अकल प्रधानले प्रवास नेपाली सम्पर्क विभाग, साउदी अरबसमक्ष सहयोगका लागि अनुरोध गर्नुभएको थियो। प्रधानको अनुरोधपछि विभागले आवश्यक पहल गरी उप्रेतीको नेपाल फर्किने हवाई टिकटको व्यवस्था गरेको हो।

प्रवास नेपाली सम्पर्क विभाग, साउदी अरबका अध्यक्ष भूपाल भण्डारीले विपद्का समयमा समस्यामा परेका नेपालीलाई सहयोग गर्नु संस्थाको मानवीय दायित्व भएको बताउनुभयो।

“विपद्को समयमा एक नेपालीलाई परेको समस्यामा अर्को नेपालीले साथ दिन सक्नु नै ठूलो मानवीय सेवा हो। राजकुमारजीले बाढीका कारण घर, पसल गुमाउनुभएको छ। यस्तो अवस्थामा उहाँलाई स्वदेश फर्किन सहयोग गर्नु हाम्रो मानवीय दायित्व हो,” अध्यक्ष भण्डारीले भन्नुभयो।

उहाँले प्रवासमा रहेका नेपालीहरू समस्यामा पर्दा आफ्नो क्षमताले भ्याएसम्म सहयोग गर्न विभाग निरन्तर प्रतिबद्ध रहेको बताउनुभयो। आगामी दिनमा पनि विपद् तथा समस्यामा परेका नेपालीहरूलाई आवश्यक सहयोगका लागि पहल गरिने उहाँको भनाइ छ।

हवाई टिकट सहयोग पाएपछि उप्रेतीले प्रवास नेपाली सम्पर्क विभाग, साउदी अरबका अध्यक्ष भण्डारीसहित सम्पूर्ण पदाधिकारी तथा सदस्यहरू र सहयोगका लागि पहल गर्ने अकल प्रधानप्रति आभार व्यक्त गर्नुभएको छ।

उप्रेतीलाई स्वदेश फर्किन सहयोग गर्ने विभागको पहलले प्रवासमा रहेका नेपालीबीचको आपसी सहयोग, एकता र मानवीय सद्भावलाई थप बलियो बनाएको छ।