गतवर्ष हलमा दर्शकले राम्रो रुचाएको सिनेमा ‘दुई नम्बरी’ टिमले यो वर्ष नयाँ सिनेमा ‘हात्तीछाप’ निर्माण गरेको छ।

काठमाडौं : गतवर्ष हलमा दर्शकले राम्रो रुचाएको सिनेमा ‘दुई नम्बरी’ टिमले यो वर्ष नयाँ सिनेमा ‘हात्तीछाप’ निर्माण गरेको छ। जुन सिनेमाको टिजर आइतबार रिलिज गरियो।

रिलिज गरिएको २ मिनेट २९ सेकेन्ड लामो टिजरमा सिनेमाका प्रमुख कलाकारहरुलाई अटाइएको छ। टिजरमा अभिनेता दयाहाङ राई र अभिनेत्री उपासना सिङ ठकुरी प्रेम जोडीको रुपमा देखिन्छन्। उनीहरूको लोभलाग्दो प्रेम छल्किएको छ टिजरमा।

यता सिनेमाका अर्का अभिनेता सौगात मल्ललाई चाहिँ स्त्री पटक्कै मन नपरेको कुरा टिजरमा देख्न सकिन्छ। टिजर हेर्दा सिनेमामा रोमान्टिकका साथै कमेडी कथावस्तु समाबेश भएको आभाष हुन्छ।

सिनेमालाई किरण नेपालीले निर्माण गरेका हुन्। आगामी माघ २६ गतेदेखि प्रदर्शनमा आउन लागेको सिनेमामा सिमोश सुनुवारको निर्देशन रहेको छ। प्रदीप भारद्वाजले सिनेमाको कथा लेखेका हुन्। अमलादेवी राई, पुष्कर गुरुङ र जय श्रेष्ठ सिनेमाको निर्मातामा रहेका छन्।

ट्रेलर हेर्नुहोस

दया, उपासना र सौगातका अलावा सिनेमामा विल्सन बिक्रम राई, बेनिशा हमाल, बुद्धि तामाङ, बिजय बराल, कमलमणी नेपाल, पुष्कर गुरुङ, प्रकाश घिमिरे लगायतका कलाकारहरुको अभिनय देख्न सकिन्छ। सुशान प्रजापतिले खिचेको सिनेमालाई निमेष श्रेष्ठले सम्पादन गरेका हुन्।