५ वर्ष पार्टी सभापति, ५ वर्ष प्रधानमन्त्री यसपालि गरेरै छोडौँ’ सगर ढकाल

काठमाडौं । राष्ट्रिय स्वतन्त्र पार्टी (रास्वपा) का केन्द्रीय सदस्य सगर ढकालले रवि लामिछाने र बालेन शाहलाई लक्षित गर्दै ऐतिहासिक जिम्मेवारीबोध गर्नुपर्ने कडा सन्देश दिएका छन्।

सामाजिक सञ्जालमार्फत आफ्नो धारणा सार्वजनिक गर्दै ढकालले एउटै पार्टीबाट पाँच वर्ष पार्टी सभापति र पाँच वर्ष प्रधानमन्त्रीको नेतृत्व सुनिश्चित गर्न सके रवि–बालेनको संयुक्त नेतृत्वलाई इतिहासले कहिल्यै नबिर्सने दाबी गरेका छन्।

“७५ वर्ष पहिलेका पुर्खा र आउने ७५ वर्षको भविष्यले सम्झिने नेतृत्व बन्न सक्ने अवसर अहिले छ,” ढकालले उल्लेख गरेका छन्, “यो सामान्य जिम्मेवारी होइन, सोचिएभन्दा निकै ठूलो जिम्मेवारी हो।”

उनले अहिलेका जनतामात्र होइन, आउँदै गरेका पुस्ताले पनि वर्तमान नेतृत्वतर्फ ठूलो आशा राखेको भन्दै यसपटक काम गरेरै देखाउनुपर्नेमा जोड दिएका छन्। “यसपालि गरेरै छोडौँ,” उनले स्पष्ट शब्दमा लेखेका छन्।
ढकालले अन्त्यमा पशुपतिनाथ, मुक्तिनाथ र बुद्धको नाम लिँदै देश र नेतृत्वलाई सही मार्गमा अघि बढाउन कृपाको कामना गरेका छन्।
उनको यो अभिव्यक्तिलाई रास्वपाभित्र नेतृत्व, उत्तरदायित्व र भविष्यको दिशाबारे गम्भीर सन्देशका रूपमा हेरिएको छ।