नेपाली सेनाको ३ अर्ब ३८ करोडको विमान, नेपाल आइपुग्यो (भिडियोसहित)

काठमाण्डौ – नेपाली सेनाले सैन्य परिवहनका लागि इन्डोनेसियासँग खरिद गरेको सीएन २३५-२२० विमान काठमाण्डौ आइपुगेको छ । कार्गाे विमान बिहान १० बजेर ५६ मिनेटमा काठमाण्डौ आइपुगेको नेपाली सेनाका प्रवक्ता सहायक रथी विज्ञानदेव पाण्डेले जानकारी दिए।

दुई वर्षअघि झण्डै साढे तीन अर्बमा नेपाली सेनाले खरिद सम्झौता गरेको थियो । यसका लागि नेपाली सेनाले सन् २०१७ को जुन महिनामा ३० मिलियन अमेरिकी डलरको सम्झौता पत्रमा हस्ताक्षर गरेको थियो ।

इन्डोनेसियाको वेस्टजाभा बान्डुङको हुसेन सास्त्रानेगारा एअरबेसबाट उडेको विमान काठमाण्डौ आइपुगेको नेपाली सेनाले जनाएको छ । सेनाका अनुसार इन्डाेनेसियाको पीटी डिरागान्तारा (सरकारी कम्पनी) ले निर्माण गरेको विमान बहुउपयोगी छ ।

अब नेपाली सेनासँग हवाई साधनको संख्या २७ पुगेको छ, जसमा १२ ओटा सञ्चालनमा छन् भने १५ ओटा ग्राउण्डेट छन् ।

‘यो विमान विपद्को समयमा विभिन्न सैन्य गतिविधिका लागि सञ्चालन गरिनेछ । यो विमानले विशेषगरी मान्छे बोक्ने, सामान बोक्ने र प्यारा टोलीलाई जम्प हान्न पनि उपयोगी हुन्छ’, प्रवक्ता पाण्डेले भने ।

यो विमानको परीक्षण उडानको प्रक्रिया भने बाँकी नै रहेको उनले जानकारी दिए । साथै यो विमान हवाई यात्रादेखि कार्गाे सुविधा पनि सञ्चालन गर्न सकिन्छ । विमानलाई परिमार्जन गरेर पनि आवश्यकताअनुसार विभिन्न उपयोगमा ल्याउन सकिन्छ ।

इन्डोनेसियाली मिडिया का अनुसार सैन्य ट्रान्सपोर्ट एयरक्राफ्ट सीएन २३५–२२० विमान नेपाली सेनालाई बुधबार हस्तान्तरण गरिएको हो। उक्त विमान इन्डोनेसियाली सरकारी कम्पनी पीटी डिरागान्तारा इन्डोनेसियाले निर्माण गरेको हो। विमान इन्डोनेसियाको वेस्ट जाभा, बान्डुङमा रहेको हुसेन सास्त्रानेगारा एयरबेसबाट बुधबार काठमाडौंका लागि उडेको थियो ।

यो विमानमा रहेका छवटा कन्फिगुरेसन मोडहरुबाट यातायात, कार्गो, प्याराट्रुप, मेडिभ्याक, मारिटाइम पेट्रोल र भीआईपी उडानका लागि आवश्यकताअनुसार प्रयोग गर्न सकिने निर्माता कम्पनीका निर्देशक एल्फिन गोएन्टोरोले पनि जानकारी दिए।

यो विमान यात्रु ओसार्न पनि प्रयोग गर्न सकिने खालको छ । यो विामनले ५१ जनासम्म यात्रु बोक्ने क्षमता राख्छ।

नेपालले धेरै प्रयोजनमा प्रयोग गर्न सकिने गरी विमानको माग गरेको बताइएको छ। नयाँ विमानमा अहिले क्याप्टेन एस्थर गायत्री सालेहले टेस्ट पाइलट र उडान निर्देशकको रुपमा तथा क्याप्टेन एर्भान गुस्तान्तोले कोपाइलटको रुपमा उडाएको समाचारमा जनाइएको छ।

नेपाली सेनाले पनि अन्तिम ग्रहणको लागि परीक्षण उडानलगायतका आवश्यक कुराहरु गर्नेछ।

साभार :- षदेश नेपाल बाट