बलिदान फिल्मको प्रदर्शन मिति सार्बजनिक गर्दै सन्तोष सेन लेख्नुहुन्छ

बलिदान फिल्मको प्रदर्शन मिति सार्बजनिक गर्दै सन्तोष सेन लेख्नुहुन्छ: ” प्रिय दर्शकवृन्द, हामी हाम्रो चलचित्र ‘बलिदान’को रिलिज मिति घोषणा गर्ने चरणमा पुग्यौ..। जब मैले ‘बलिदान’ जस्तो चलचित्र निर्माण गर्ने सोच बनाएको थिएँ, यसका लागि यति ठूलो बलिदानी दिनुपर्छ भन्ने कल्पनासम्म गरेको थिइनँ । कथाले सिंगो जननी बोकेको कारणले पनि जीवनभर बगाएको रगत-पसिनामध्ये सबैभन्दा धेरै यसमा बगाएको महसुस भएको छ ।

यस चलचित्रको मूल आधार यसको कथा नै हो । लेखकहरूसँग बारम्बारको संवादपछि यो कथा केवल एउटा समयको मात्रै नभई हिजो, आज र भोलिको – सबै युगको कथाको पनि महाकथा बन्न पुग्यो । यसले यहाँ मात्र होइन, जहाँसुकै हुने शोषण र शोषित वर्गको यथार्थ चित्रण गर्छ । यही कारण, हामीले निर्माणको कुनै पक्षमा सम्झौता गर्न सकेनौँ । कलाकार छनोटदेखि प्रविधि र प्राविधिक पक्षसम्म, निर्माण देखि व्यवस्थापनसम्म, गीत सङ्गीत देखि सम्पादनसम्म – सबै क्षेत्रमा उत्कृष्टता हासिल गर्न हाम्रो टिमले अहोरात्र परिश्रम गरिरहेका छौँ ।

हाल ‘बलिदान’को सम्पूर्ण प्रोडक्सन कार्य सम्पन्न भइसकेको छ, र हामी पोस्ट-प्रोडक्सन प्रक्रियामा प्रवेश गरेका छौँ । चलचित्रलाई अझ उत्कृष्ट बनाउन दक्षिण भारतीय फिल्म उद्योगका प्रविधि र सीपको उपयोग गर्दैछौँ, जसका कारण रिलिजमा केही समय लाग्ने देखिएको छ । दशैँको आसपास चलचित्रको सम्पूर्ण काम पूरा हुनेछ । दशैँको फूलपातीका दिन कालीमातालाई यो जगतलाई दुःख दिने दानवरुपीको नाममा बली चढाउने परम्परा रहिआएको छ । संयोगवश, ‘बलिदान’को कथामा कालीमाताका अगाडि दानवी प्रवृत्तिका शोषकहरूको बलि दिने भावना समेटिएको छ । यही सन्दर्भलाई आत्मसात् गर्दै, ‘बलिदान’ २०८२ सालको फूलपाती (असोज १३) मा रिलिज गर्ने निर्णय गरेका छौँ ।

{हामीले एक वर्षअघि सार्वजनिक गरेको ‘फर्स्ट ल्यान्डिङ’ प्री-टिजरमा २०८१ सालको फूलपातीलाई रिलिज मिति घोषणा गरेका थियौँ । यो चलचित्र एउटा दस्तावेज बनोस् भनेर अझ बलियो रूपमा प्रस्तुत गर्न, हामीले एक अतिरिक्त वर्ष लिएका हौँ ।}

‘बलिदान’ निर्माणमा बगाएको रगतपसिना चलचित्र प्रेमी आदरणीय दर्शकहरूका लागि उत्कृष्ट चलचित्र पस्किने उद्देश्यले नै हो । अबको यात्रा तपाईंहरूको साथ र सहयोगबिना अपूर्ण रहनेछ । त्यसैले, हामी तपाईंहरूको गाउँ, टोल, बस्ती, घर—जहाँजहाँ आम दर्शक त्याहा त्याहा बिकुल फुक्न, आउनेछौँ ।

रिलिज मिति घोषणासँगै, ‘बलिदान’को सानो लुक पोस्टर सार्वजनिक गरेका छौँ । चाँडै नै भिडियो कोशेली मार्फत आउँदैछौँ ।