घाइते कृष्ण दासको उपचारमा हेल्प मधेशीको सहयोग

महोत्तरी । महोत्तरी गाउँपालिका–३ मडई निवासी राम दिनेश दासका छोरा कृष्ण दासको उपचारका लागि हेल्प मधेशी साउदी अरबले २० हजार रुपैयाँ आर्थिक सहयोग गरेको छ।

केही दिनअघि रुखमा चढेर हाँगा काट्ने क्रममा अचानक लडेर इँटाको पर्खालमुनि खस्दा गम्भीर घाइते भएका दासको उपचार भइरहेको छ। आर्थिक अवस्था कमजोर रहेका कारण उपचारमा समस्या भएपछि परिवारले सहयोगका लागि अपिल गरेको थियो।

पीडितको अवस्थालाई ध्यानमा राख्दै हेल्प मधेशी साउदी अरबका अध्यक्ष श्याम कुमार महत्तोको पहलमा उपचारका लागि सहयोग उपलब्ध गराइएको हो। सहयोग रकम हेल्प मधेशी नेपालका केन्द्रीय कार्यवाहक अध्यक्ष संजय कुमार यादव, धनुषा जिल्ला अध्यक्ष राजेन्द्र कुमार यादव तथा स्थानीयवासीको उपस्थितिमा पीडित परिवारलाई हस्तान्तरण गरिएको जनाइएको छ।

हेल्प मधेशीले समस्यामा परेका तथा आर्थिक रूपमा विपन्न व्यक्तिको उपचार तथा मानवीय सहयोगमा निरन्तर सहकार्य गर्दै आएको जनाएको छ। गम्भीर अवस्थामा रहेका कृष्ण दासको उपचारका लागि थप सहयोग आवश्यक रहेकाले परिवारले इच्छुक व्यक्ति तथा संघ–संस्थालाई सहयोग गर्न आग्रह गरेको छ।