साउदीको रियादमा रचना रिमालको सांगीतिक प्रस्तुति दिने

रियाद, साउदी अरब। अन्जान गुभाजु । साउदी अरबमा रहेका नेपालीहरूका लागि आगामी अगस्ट ७ विशेष आकर्षणको दिन बन्ने भएको छ। झापाली समाज–साउदी अरबियाले आफ्नो तेस्रो महाधिवेशन तथा भव्य सांस्कृतिक कार्यक्रम रियादको एक्जिट–१३ मा आयोजना गर्ने भएको छ। कार्यक्रममा नेपालकी चर्चित गायिका रचना रिमालको विशेष सांगीतिक प्रस्तुति रहनेछ।

आयोजकका अनुसार कार्यक्रममा स्थानीय कलाकारहरूको प्रस्तुति, विविध सांस्कृतिक कार्यक्रम तथा नेपाली समुदायबीच आपसी सद्भाव, भाइचारा र एकता प्रवर्द्धन गर्ने विशेष अवसर रहनेछ। कार्यक्रम दिउँसो १२ बजेदेखि सुरु हुनेछ भने प्रवेश शुल्क २५ साउदी रियाल तोकिएको छ।

झापाली समाज–साउदी अरबियाका अध्यक्ष रबिन गिरीले कार्यक्रमबारे जानकारी दिँदै साउदी अरबमा रहेका सम्पूर्ण नेपाली समुदायलाई कार्यक्रममा सहभागी हुन आग्रह गरेका छन्।

अध्यक्ष गिरीले भने, “यो कार्यक्रम केवल मनोरञ्जनका लागि मात्र होइन, नेपाली समुदायलाई एकताबद्ध गर्ने, आपसी सम्बन्ध सुदृढ बनाउने र सामाजिक सेवामा योगदान पुर्‍याउने साझा अभियान पनि हो। हामी सम्पूर्ण नेपाली दाजुभाइ तथा दिदीबहिनीहरूलाई कार्यक्रममा उपस्थित भई यसको गरिमा बढाइदिन हार्दिक अनुरोध गर्दछौं।”

उनले कार्यक्रमबाट संकलित रकमको सम्पूर्ण खर्च कटाएर बचत हुने रकम वृद्धाश्रमलाई सहयोगस्वरूप प्रदान गरिने जानकारी दिँदै सहभागितामार्फत सामाजिक उत्तरदायित्व निर्वाह गर्न सबैलाई आग्रह गरे।

साउदी अरबभर कार्यरत नेपाली व्यवसायी, विभिन्न संघ–संस्थाका प्रतिनिधि, बुद्धिजीवी, श्रमिक तथा आम नेपाली समुदायको उल्लेखनीय सहभागिता रहने अपेक्षा गरिएको यस कार्यक्रमलाई नेपाली कला, संस्कृति, मनोरञ्जन र मानव सेवाको संगमका रूपमा हेरिएको छ।

मनोरञ्जनसँगै समाजसेवाको उद्देश्य बोकेको यस कार्यक्रमले साउदी अरबस्थित नेपाली समुदायमा सकारात्मक सन्देश प्रवाह गर्ने विश्वास आयोजकको छ।

साउदी अरेबिया नेपाली श्रमिकहरुको राहत तथा उद्दार र सामाजिक अभियानमा समाज सक्रिय रहदै आईरहेको छ।