इटहरी रंगशालामा सात दिन भित्र सय वेडको आइसोलेसन बन्दै

इटहरी रंगशालामा सात दिन भित्र सय वेडको आइसोलेसन निर्माण सम्पन्न गरिने भएको छ । प्रदेश सांसद सर्वध्वज साँवाको प्रमुख आतिथ्यमा इटहरी उपमहानगरका प्रमुख द्धारिकलाल चौधरीको अध्यक्षतामा रंगशालामा वसेको कोभिड रोगथाम, तथा नियन्त्रण तथा ब्यवस्थापन नगरस्तरीय समिति इटहरीको वैठकले यस्तो निर्णय गरेको हो ।वैठकले आवश्यक स्वास्थ्य जनशक्ति वीपीकोइराला स्वास्थ्य विज्ञान प्रतिष्ठान र वाइफाईका लागि नेपाल टेलिकम सँग माग गर्ने निर्णय गरेको छ ।

वैठकलाई सम्वोधन गर्दै प्रदेश सांसद सर्वध्वज साँवाले प्रदेश सरकारले आइसोलेसन निर्माणका लागि २० लाख उपलब्ध गराएको जानकारी दिनुभयो । उहाँले आवश्यक पर्ने अन्य सहयोगका लागि प्रदेश र संघीय सरकारसँग पहल गर्ने प्रतिवद्धता जनाउनुभयो । उपमहानगरका प्रमुख द्धारिकलाल चौधरीले काम तिव्र ढंगले अघि वढाउन निर्देशन दिनुभयो । उपमेयर लक्ष्मी गौतमले महिलाका लागि छुटटै र सुरक्षित ब्यवस्था गरिनुपर्नेमा जोड दिनुभयो ।

प्रमुख प्रशासकीय अधिकृत कृष्ण प्रसाद सापकोटाले आइसोलेसनमा निर्माणका लागि विभिन्न कार्यालय र सस्था सँग आवश्यक पहल भएर तिव्रताका साथ काम भइरहेको जानकारी दिनुभयो ।ब्यवस्थापन उपसमिति संयोजक भूपेन्द्र वरालले आइसोलेसन निर्माण र संचालनका लागि सवैमा आग्रह गर्नुभएको छ । वैठकमा ब्यवस्थापन उपसमितिका सदस्य सचिव महेश सुवेदीले अहिले सम्म भएको प्रगतिका वारेमा जानकारी गराउनुभयो । उहाँका अनुसार विद्युत,खानेपानी र शौचालयका लागि तिव्र ढंगले काम अघि वढेको छ ।

जमिन सम्याउने काम भइरहेको छ । त्यहाँ वाइफाई र सिसी क्यामेरा जडानका लागि प्रक्रिया अघि वढेको छ । १२ वटा शौचालय र २ वटा वाथ रुम निर्माण गरिने भएको छ । इटहरीमा वढदै गएका लक्षण नदेखिएका संक्रमितहरुलाई सो आइसोलेसनमा राखिने छ ।