नेपालगन्ज उपमहानगरपालिका १२ बेलासपुरका सतेन्द्र विसीको हत्या नै भएको परिवारले दावी

नेपालगन्ज उपमहानगरपालिका १२ बेलासपुरका सतेन्द्र विसीको हत्या नै भएको परिवारले दावी गरेको छ । नेपालगन्ज खजुरा सडकखण्ड अन्तर्गत जानकी गाउँपालिका ३ को सडक छेउमा विसीको शव कार्तिक २० गते विहान भेटिएको थियो । बाँके प्रहरीले सवारी साधनको ठक्करबाट विसीको ज्यान गएकोे बताएपनि घटना रहस्यमय भएको परिवारको दावी छ । घटनाको करिव एक महिनापछि विसीकी पत्नि जानकीले मंगलवार नेपालगन्जका सन्चारकर्मीसँग कुरा गर्दै घटनामा प्रहरीले प्रभावकारी अनुसन्धान नगरेको दुखेसो पोख्नुभयोे । मृत्यु हुनु भन्दा अघिल्लो दिनसम्म परिवारकै सम्पर्कमा रहेको व्यक्ति भोलीपल्ट त्यस्तो अवस्थामा भेटिनु रहस्यमय भएको जानकीको भनाइ छ । जग्गाको कारोवार गर्ने विसी १९ गते सुर्खेत जान्छु भनेर घरबाट हिडेको जानकीले बताउनुभयो । गाडीले ठक्कर दिएको भए शरिरका अन्य ठाउँमा पनि चोट लाग्नु पर्ने हो तर त्यस्तो नदेखिएको भन्दै उहाँले हत्या नै भएको दावी गर्नुभयो । प्रहरीले पोष्टमार्टम रिपोर्टमा टाउकोमा चोट लागेको देखाएको जनाएको छ । बाँकेका प्रहरी प्रमुख एसपी बीरबहादुर ओलीले घटनालाई आफुहरुले गम्भीरताका साथ लिएको भन्दै अनुसन्धान भइरहेको बताउनुभयो । परिवारजनले भने प्रहरीको अनुसन्धान प्रभावकारी नभएको गुनासो गरेका छन् । घटना भएको महिना दिन वित्नै लाग्दा समेत प्रहरीले कुनै चासो नदिएको विसीकी पत्नि जानकीले बताउनुभयो ।