साउदीमा ३२औँ विश्व आदिवासी दिवस मनाइँदै, तयारी पूरा

दम्माम, साउदी अरब । नेपाल आदिवासी जनजाति महासंघ (नेफिन) राष्ट्रिय समन्वय परिषद् साउदी अरबको आयोजनामा ३२औँ विश्व आदिवासी दिवस विविध कार्यक्रमसहित मनाइने भएको छ।

आगामी १४ अगस्ट २०२६ शुक्रबार दम्मामस्थित रोज गार्डेनमा आयोजना हुने कार्यक्रम दिउँसो १ बजे सुरु हुनेछ। कार्यक्रमको सम्पूर्ण तयारी पूरा भएको नेफिन साउदीका अध्यक्ष खेम गुरुङले जानकारी दिएका छन्।

विश्वभरका आदिवासी जनजातिको अधिकार, पहिचान, संस्कृति र परम्पराको संरक्षण तथा प्रवर्द्धन गर्ने उद्देश्यले आयोजना गरिएको कार्यक्रममा साउदी अरबमा रहेका नेपाली आदिवासी जनजाति समुदायका साथै विभिन्न संघसंस्थाका प्रतिनिधि तथा नेपाली समुदायको सहभागिता रहने आयोजकले जनाएको छ।

कार्यक्रममा साउदी अरबमा रहेका स्थानीय नेपाली कलाकारहरूले विभिन्न सांस्कृतिक प्रस्तुति समेत दिने भएका छन्। मौलिक कला, संस्कृति, भेषभूषा र परम्परालाई कार्यक्रममार्फत प्रस्तुत गरिने आयोजकको भनाइ छ।

नेफिन साउदीले कार्यक्रममा सहभागी भई कार्यक्रमलाई सफल बनाउन साउदी अरबमा रहेका सम्पूर्ण नेपाली दाजुभाइ तथा दिदीबहिनीहरूलाई हार्दिक निमन्त्रणा गरेको छ।