मनास्लु इन्टरनेशनल सर्भिसेज प्रा.लि.का सञ्चालक बालकृष्ण श्रेष्ठले नेपाल वैदेशिक रोजगार व्यवसायी संघको आगामी निर्वाचनमा द्वितीय उपाध्यक्ष पदका लागि उम्मेदवारी घोषणा गरेका छन्। बैरो स्वतन्त्र व्यवसाय संघको प्रस्तावमा उनलाई उक्त पदमा उम्मेदवार बनाइएको हो।
श्रेष्ठले भिडियो सन्देशमार्फत राजनीतिकभन्दा माथि उठेर व्यवसायीका हकहितको संरक्षण, वैदेशिक रोजगार क्षेत्रको सुधार तथा संघको संस्थागत सुदृढीकरणलाई आफ्नो प्रमुख एजेण्डा रहेको बताएका छन्। उनले व्यवसायीमाथि बढ्दो प्रशासनिक जटिलता, डिमाण्ड प्रमाणीकरणमा हुने ढिलाइ, श्रम स्वीकृति प्रक्रियाका समस्या तथा वैदेशिक रोजगार क्षेत्रका विविध चुनौती समाधानका लागि प्रभावकारी पहल गर्ने प्रतिबद्धता व्यक्त गरेका छन्।
साथै उनले व्यवसायी र श्रमिकबीच विश्वासको वातावरण निर्माण गर्दै सुरक्षित, मर्यादित र व्यवस्थित वैदेशिक रोजगारीका लागि संघलाई थप सशक्त बनाउने आफ्नो योजना रहेको स्पष्ट पारेका छन्।
उनका चुनावी प्रतिबद्धतामा श्रमिक र व्यवसायीबीच विश्वास अभिवृद्धि, संघमा पारदर्शिता, जवाफदेहिता र संस्थागत सुशासन, सरकारी निकायसँग प्रभावकारी समन्वय तथा सहकार्य, व्यवसायीका हकहित र अधिकारको संरक्षण, वैदेशिक रोजगार क्षेत्रका नीतिगत सुधारका लागि पहल तथा व्यवसायीमैत्री वातावरण निर्माण प्रमुख रहेका छन्।
Discussion about this post