साउदी अरबमा ‘त ल्हो’ तमु ल्होछार २०८२ भव्य रूपमा मनाइँदै (भिडियो सहित)

साउदी अरब — तमु समुदायको मौलिक तथा ऐतिहासिक महान राष्ट्रिय पर्व ‘त ल्हो’ तमु ल्होछार २०८२ साउदी अरबमा भव्य रूपमा मनाइने भएको छ। तमु धि नेपाल प्रवास शाखा, साउदी अरबले प्रेस विज्ञप्ति जारी गर्दै ल्होछारलाई स्थापना कालदेखि निरन्तरता दिँदै यस वर्ष पनि उल्लासपूर्वक मनाउन लागिएको जनाएको हो।

विज्ञप्तिअनुसार यस वर्ष ल्होछारको अवसरमा नेपालबाट आमन्त्रित कलाकारहरूबाट सांस्कृतिक प्रस्तुति सहित कार्यक्रम आयोजना गर्ने योजना रहे पनि विविध प्राविधिक कारणवश उनीहरूको सहभागिता सम्भव हुन नसकेको जनाइएको छ।

तर, तमु मौलिक संस्कार, संस्कृति झल्कने बाजागाजा (घाँकी) तथा साउदी अरबमै रहेका तमु समुदायका कलाकारहरूद्वारा मौलिक सांस्कृतिक प्रस्तुतिसहित ल्होछार मनाउने तयारी पूरा भएको आयोजकले जनाएको छ।

कार्यक्रममा साउदी अरबमा रहनुभएका तमु तथा गैर–तमु नेपाली दाजुभाइ, दिदीबहिनीहरूको उल्लेख्य सहभागिताबाट कार्यक्रम सफलतापूर्वक सम्पन्न गर्न सहयोग गरिदिन आयोजक संस्थाले हार्दिक अनुरोध गरेको छ।

ल्होछार कार्यक्रम २ जनवरी २०२६, शुक्रबार का दिन अल खोबरस्थित क्लासिक रेस्टुरेन्ट मा आयोजना हुनेछ। कार्यक्रममा प्रवेश निःशुल्क रहनेछ।

कार्यक्रम तमु धि नेपाल प्रवास शाखा तथा क्षेत्रीय समिति रियाद–दमामको संयुक्त आयोजनामा हुन लागेको हो।